УИХ-ын чуулганы өчигдрийн хуралдаанаар Монгол Улсын Засаг захиргаа, нутаг дэвсгэрийн нэгжийн тухай хуулийн шинэчилсэн найруулгын төслийг хэлэлцэж, эцэслэн баталлаа.

Хуулийн төсөлд УИХ-ын гишүүн С.Амарсайхан “Аймаг, нийслэл, дүүргийн Иргэдийн төлөөлөгчдийн хурлын төлөөлөгчид зөвхөн төлөөлөгчийн ажлаа хийх ёстой” хэмээн гаргасан санал нь дэмжигдэж, батлагдлаа.  

Тэрбээр хуулийн төслийн хэлэлцүүлгийн үед “Аймаг, нийслэл, дүүргийн Иргэдийн хурал бол төлөөллийн байгууллага учир төлөөлөгчид төлөөлөгчийн ажлаа хийх ёстой. Тэд хөгжлийн бодлогоо тодорхойлж, төсвөө батлан, төрийн захиргааны байгууллагад хяналтаа тавьж, иргэдтэйгээ ойр ажиллах учиртай юм. Гэтэл төсвөө ч баталж, шийдвэрээ ч гарган, хэрэгжүүлэх бүхий л үйл ажиллагаанд оролцож байгаа нь эргээд орон нутаг сум, дүүргийг хөгжүүлж, улстөржилтөөс ангид байлгаж, төрийн албыг мэргэшүүлж, чадавхжуулна гэдэг зарчимтай огт нийцэхгүй байна. Мэргэжлийн бус төлөөлөгчид давхар төрийн алба хашиснаар төрийн албыг улам сулруулж байна. Төрийн албан хаагчид ч улстөржилт, сонгуулийн золиос болж, төрийн албанд итгэж өөрийгөө урт хугацаанд бэлддэг, итгэдэг чадвартай боловсон хүчин байхгүй боллоо” хэмээн байр сууриа илэрхийлсэн юм.