УИХ-ын гишүүн С.Амарсайхан чуулганы хуралдаанаар эрүүл мэндийн салбарын төсөв болон тусламж үйлчилгээ авч байгаа иргэдийн нөхцөл байдал, I, II, III эмнэлгүүдээр очсон талаараа хэллээ.

Тэрээр, манай улсын эрүүл мэндийн салбар коронавирусийн халдвараас сэргийлэхэд анхаарал хандуулсаар бусад өвчний улмаас эмчилгээ, үйлчилгээ авахад хүндрэлтэй болж байгаад иргэд хохирч байгаа, цар тахлын үед шуурхай арга хэмжээ авч ажиллах нь зүйн хэрэг боловч яаралтай тусламж үйлчилгээ, бусад эмчилгээ авч буй иргэдэд хүндрэл учирч байгааг хэллээ.

УИХ-ын гишүүн С.Амарсайхан:

-Би зориуд тусламж үйлчилгээ авах хүний хажууд байж, дуудлага өгч хугацааг нь үзсэн.  Хөл хорионы үед яаралтай тусламжийн үйлчилгээ хүлээгдэлтэй 1-1.5 цаг хүлээж байж тусламж авч байна. Мөн I, II, III эмнэлгүүдээр очсон. Үзүүлж байгаа иргэд тариураас бусад бүх эм боолтыг гаднаас өөрсдөө авч байна. Санхүүгийн чадваргүй иргэдэд хүнд тусаж байна. Эрүүл мэндийн салбар ганхаж эхэлж байна. Зөвхөн ковид гэсээр байтал ажил үүргийн хуваарилалт орхигдож байна. Төсөв мөнгө эмнэлгүүдэд очихгүй байна. Энэ тал дээр анхаарч ажиллах шаардлагатай байна. Эмч бүр дээр очсон өвчтөн өвчин, зовлонгоо ярьж байна. Яагаад нэгдсэн цахим систем байдаггүй юм бэ. Бүх эм тариагаа өвчтөнүүд гаднаас авч байна. Мөнгөгүй хүн үх л гэж байна.

Түүний асуултад ЭМЯ-ны Төрийн нарийн бичгийн дарга Я.Амаржаргал "тийм зүйл байхгүй" гэх тайлбар хийсэн юм. Харин УИХ-ын гишүүн С.Амарсайхан МЯ-ны Төрийн нарийн бичгийн дарга Я.Амаржаргалд хандан хэлэхдээ “Байгаа болоод хэлээд байна. Та өөрийн биеэр шалгаж үз. Эсвэл өөр хүн томилоод шалгуул. Коронавирусийн халдвар гэсээр байтал үхэх ёсгүй өвчнөөр хүмүүс амиа алдаж байна. Сэргийлж болох зүрх судасны өвчин гэх мэт өвчнөөр өвдөөд тусламж авч чадахгүй байна. Ийм албан тушаалтай хүн байдаг л зүйл мэт яриад сууж болохгүй. Таны өгч байгаа мэдээлэл бүгд худлаа шүү. Алдаа дутагдлаа засах хэрэгтэй” хэмээв.