УИХ-ын чуулганы хуралдаанаар Ерөнхий сайд Л.Оюун-Эрдэнэ танхимынхаа шинэ сайд нарыг Монгол Улсын Ерөнхийлөгч Х.Баттулга болон УИХ-д танилцуулж байна. Энэ үеэр УИХ-ын гишүүд сайдад нэр дэвшигчдээс асуулт асууж, үг хэлж байна.

УИХ-ын гишүүн М.Оюунчимэг "Цар тахлын амаргүй үед зоригтой алхмууд хийгээд иргэд рүү чиглэсэн алхам хиймээр байна. Коронавирусийн үед арай зөөлөн бодлогоор асуудал шийдэх ажлууд хийгдэж ирсэн. Цаашид системтэй ажиллах ёстой. Энэ тал дээр Шадар сайдад нэр дэвшигч С.Амарсайхан гишүүний байр суурийг сонсъё" хэмээн асуув.

Шадар сайдад нэр дэвшигч С.Амарсайхан "Улсын Онцгой комисс цар тахлын голомтыг бууруулах, нэг ч тохиолдолгүй болохын төлөө бүх хүчээ дайчлан ажиллана. Цаашид байдал хүндрэхийг үгүйсгэхгүй. Тэдгээрийг хошуучилж ажиллах бүх шатны албан хаагчид хариуцлагаараа, өндөр зохион байгуулалтаараа, гүйцэтгэл, хяналтаараа энэ цар тахлыг хяналтад авах зорилго тавьж ажиллана.

Гэхдээ үйл ажиллагааг хаахгүйгээр ажиллана. Төр, хувийн гэлтгүй үйл ажиллагаа явуулж байгаа л бол тэнд бүх шатны хяналт тавина. Шаардлагатай дүрэм журмын өөрчлөлтийг хийнэ. Мэдээллийн ил тод байдлыг нэгдүгээрт тавина. Иргэдийнхээ айдасгүй ажиллаж амьдрах боломжийг бүрдүүлнэ. Технологийн дэвшилийг түлхүү ашиглана. Шийдвэр бүр зөв байхгүй байхыг үгүйсгэхгүй. Амаргүй цаг үед эрэмбэ дарааны зөрчилтэй олон шийдвэр гарч байгаа. Энэ бол дэлхий нийтэд тулгамдсан асуудал учраас иргэн бүр сахилга баттай баймаар байна. Дээрээ шийдвэр гардаг доороо замхардаг байж болохгүй. Өмнөх УОК сайн ажилласан. Харамсалтай нь зарим шийдвэрийн хэрэгжилт доод шатанд хэрэгжээгүй. Амаржсан эхийн асуудал бол өдөр тутмын хэвийн үзэгдэл шиг болсон асуудал. Тиймээс цаашид иргэдийнхээ оролцоог хангаж ажиллах болно" хэмээлээ.

УИХ-ын чуулганы нэгдсэн хуралдаан үргэлжилж байна.