Олон улсын хэрэглэгчийн эрхийг хамгаалах өдрийг тохиолдуулан “Ковид-19 цар тахлын үе дэх хэрэглэгчийн эрхийг хамгаалах байгууллагын үүрэг” сэдэвт олон улсын цахим хурлыг өнөөдөр зохион байгууллаа.

Монгол Улсын Шадар сайд С.Амарсайхан цахим хуралдааныг нээж хэлсэн үгэндээ цахим эдийн засаг, хариуцлагатай эко хэрэглээг төлөвшүүлэх, хэрэглэгчийн хэрэглээний боловсролыг тасралтгүй дээшлүүлэх бодлого баримталж өндөр ач холбогдол өгч байгаагаа илэрхийллээ. Тэрбээр “Ковид-19” цар тахал, гамшиг нь бидэнд даяаршил хэрхэн тэлснийг, шинжлэх ухаан, мэдээллийн технологийн үр өгөөжийг, улс төр, эдийн засгийн интеграц хэрхэн өргөжсөнийг, улс хоорондын харилцан хамаарал хэрхэн гүнзгийрснийг харуулж байна. Цахим хурлын үр дүнд цар тахлын үед НҮБ-аас өрсөлдөөн, хэрэглэгчийн асуудлаар баримталж буй бодлого, улс орнуудын авч хэрэгжүүлж буй арга хэмжээний талаар харилцан туршлагаа хуваалцаж, үнэлэлт дүгнэлт өгөн, үйл ажиллагаагаа илүү төгөлдөржүүлэхэд оролцогч улс орнуудад дэмжлэг үзүүлнэ гэдэгт итгэлтэй байна” гэв.

Хоёр өдөр үргэлжлэх цахим хуралдаанд НҮБ-ын Худалдаа, Хөгжлийн газар , БНХАУ-ын Зах зээлийг хянан зохицуулах газар /Цахим худалдааны газрын Хэрэглээний орчны байгууламжийн хэлтсийн дэд захирал Тан Хонгбо/, Итали Улсын өрсөлдөөн ба зах зээлийн газрын /Европын болон олон улсын харилцааны газрын дарга Жанлука Сепе/ илтгэл тавилаа.

Цахим хуралд НҮБ-ын Худалдаа, хөгжлийн газар, Италийн Өрсөлдөөн, хэрэглэгчийн байгууллага, БНХАУ-ын Зах зээлийг хянан зохицуулах газрын төлөөлөгчид илтгэгчээр оролцох ба БНХАУ, БНСУ, Итали, Барбадос, Их Британи, Польш, Бельги зэрэг улсын Хэрэглэгчийн байгууллагын төлөөлөгчид оролцов